Kerċem, it-Tnejn 8 ta' Frar 2010

Ftit tas-snin ilu, il-Kunsill Lokali Rabat (Għawdex) kien ħa deċiżjoni li Triq Mons. Luigi Vella fir-Rabat tingħalaq għat-traffiku bejn id-9.00pm u l-5.00am.  Din id-deċiżjoni ma kienet niżlet tajjeb xejn mar-residenti ta' Kerċem, u l-Kunsill tagħna kien oġġezzjona mal-awtoritajiet konċernati dwar dan.  Sa kienet saret petizzjoni li ġiet iffirmata minn mijiet ta' residenti.  Kulħadd jaf li din it-triq tgħaqqad lir-raħal tagħna mal-kumplament ta' Għawdex. 

Il-Kunsill Lokali Rabat immexxi mis-Sindku Dr. Samwel Azzopardi, bidel dik id-deċiżjoni, u wara li kiseb il-permessi neċessarji minn Transport Malta reġa fetaħ din it-triq matul il-ħinijiet kollha tal-ġurnata. 

Din id-deċiżjoni intlaqgħet b'sodisfazzjon mill-Kunsill Lokali Kerċem u anke mir-residenti kollha.  Din hija riżultat ċar li meta jirrenja d-djalogu, l-affarijiet isiru ferm aħjar u bl-anqas tbatija lil ħadd.  Nirringrazzjaw lil dawk kollha li fehmu t-tbatija bla bżonn li kienu qed isofru n-nies ta' Kerċem.

Gozo Stadium, il-Ħadd 7 ta' Frar 2010

F'logħoba oħra tal-kampjonat Għawdxi tal-Ewwel Diviżjoni, t-tim tagħna tal-Kerċem Ajax tilef konfront dirett kontra t-tim ta' Xewkija, biex b'din it-telfa issa l-Ajax spiċċaw fl-aħħar post tal-klassifika.  L-iskor finali kien 1-0 favur it-Tigers, gowl li kisbuħ minn penalty fit-tieni taqsima.

Formazzjoni tat-timijiet:

KERĊEM AJAX F.C.: C. Mercieca, F. Camilleri, M. Tabone, J. Mercieca, D. Sakic, D. Mercieca, E. Hussein (J.P. Mizzi), M. Mamo (K. Mifsud), M. Stojanovic, C.J. Achokwu, J. Debrincat (L. Camilleri).

Xewkija Tigers: J. Xuereb, P. Camilleri, J. Xerri, Js. Vella, A. Fotso, M. Xerri, J. Cefai, B. Chibueze (Js. Azzopardi), P. Rapa (S. Mizzi), C. Bugeja (J. Azzopardi), R. Buttigieg. 

Il-penalty ta' Xewkija ġie skurjat minn B. Chibueze fil-85'.

Referee:  Feodor Zammit.

Il-logħoba li jmiss għal Kerċem Ajax hija skedata għal Ħadd 21 ta' Frar fit-3.00pm kontra Victoria Hotspurs.

Għafas fuq "read more" biex tara rapport dettaljat tal-logħoba.  Bil-kollaborazzjoni tal-GFA.

Kerċem, il-Ħamis 4 ta' Frar 2010

Il-Kunsill Lokali Kerċem qed jistieden kumpaniji li jipprovdu u jistallaw solar water heaters u pannelli votofoltajiċi, u li huma nteressati li joffru l-aħjar offerti għar-residenti ta’ Kerċem.  Il-kumpaniji jistgħu jinkludu s-sussidji tal-MRA.  L-offerti jridu jaslu ssiġillati u jkunu ndirizzati lis-Segretarju Eżekuttiv, Kunsill Lokali Kerċem, Pjazza Orvieto, Kerċem KCM 1360, Għawdex, sal-Ġimgħa 19 ta’ Frar 2010 f’nofs in-nhar. 

Kerċem, l-Erbgha 2 ta' Frar 2010

Il-Kunsill Lokali Kerċem qed jirċievi kwotazzjonijiet marbuta mal-festival "Is-Sagra ta' San Girgor" ghal:

• Materjal pubbliċitarju stampat (Quotation 01/2010)
• Sistema ta' sound (Quotation 02/2010)

Ghal aktar dettalji mitlubin tikkuntattjaw il-Kunsill Lokali Kerċem.  Il-kwotazzjonijiet jaghalqu nhar il-Ġimgha 12 ta' Frar 2010 f'nofs in-nhar.

Komunita ta' Santa Luċija, Kerċem, is-Sibt 30 ta' Jannar 2010

Għal aktar minn tlett sigħat, il-Prim Ministru Dr. Lawrence Gonzi għaddieh fir-raħal tagħna, preċiżament fil-Komunita' ta' Santa Luċija fejn iltaqa' ma numru kbir ta' familji fi djarhom u fit-toroq.

Il-Prim Ministru żar għadd ta' toroq li jiffurmaw parti mill-komunita' ta' Santa Luċija u kien akkumpanjat mis-Sinjura tiegħu Kate, mis-Sindku ta' Kerċem Joe Grima, il-Viċi Sindku Mario Azzopardi u l-Kunsilliera Antoinette Borg, is-Segretarju Ġenerali tal-Partit Nazzjonalista Dr. Paul Borg Olivier u uffiċjali oħra. 

L-aħħar impenn tal-Prim Ministru kien quddiesa fil-knisja ta' Santa Luċija u li tmexxiet mir-Rettur Dun Franġisk Sultana u bi żjara fil-Knisja.